الكلام مالوش فايدة

الكلام ما لوش فايدة
[ندعوك للتسجيل في المنتدى أو التعريف بنفسك لمعاينة هذه الصورة]

قال الطفل ذو السنوات الثلاث لوالده:
- بابا، مش إنت وماما بتقولوا إنى اتعلمت الكلام خلاص، وبقيت بعرف أتكلم؟
- أيوه. شاطر يا حبيبى.
- أقول إيه بعد ما اتعلمت الكلام يا بابا؟
- مش فاهم.
- قصدى احنا اتعلمنا الكلام عشان نعمل بيه إيه؟
- آه فهمت، حاجات كتير يا بنى. يعنى لما تعوز حاجة تقول.
- لما أعوز حاجة أقول؟
- آه.
- طيب أنا عاوز عجلة

[ندعوك للتسجيل في المنتدى أو التعريف بنفسك لمعاينة هذه الصورة].
- لأ.
- مش إنت لسه قايل إنى لما أعوز حاجة أقول؟
- آه، بس ده مش معناه إنها حتجيلك.
- يبقى أنا استفدت إيه؟
- ولا حاجة.
- طيب وحاعمل إيه تانى بالكلام؟
- تعترض على الأوضاع اللى مش عاجباك.
- إزاى؟
- لما تكبر تكتب فى الصحف وترسل ارائك

[ندعوك للتسجيل في المنتدى أو التعريف بنفسك لمعاينة هذه الصورة]
- وأكتب إيه كمان؟
- تحارب الفساد، وتطلب تنضيف المدن ورفع الزبالة..حاجات كده يعنى.
- ولما أكتب فى الصحف حيحصل حاجة؟
- غالبا ودائما لا
- يبقى اكتب ليه إذا كان مش حيحصل حاجة؟
- معرفش.
- طب وحاعمل إيه تانى بالكلام؟
- لما تكبر، وتحب الستات تبقى تعاكسهم وبعدين تتجوزهم.
- هو أنا لما أكبر حاحب الستات؟
- آه، وما تسألنيش ليه؟، حكمة ربنا.
- وحأعاكسهم إزاى يا بابا؟
- والله يا بنى دى بتختلف.. حسب إحنا ربيناك كويس ولا لأ.
- إنتم ربتونى كويس يا بابا؟
- لأ.
- ولما أحب أعاكس ست أقول إيه؟
- بصراحة يا بنى أنا بقالى كتير ما عاكستش، لكن ممكن تقول إيه الحلاوة دى.
- (بصوت عال) ماما..إيه الحلاوة دى؟
- وطى صوتك يا حمار.
- ليه يا بابا؟ مش ماما ست؟
- أيوه ست، لكن مش أى ست تعاكسها.
- أمال أعاكس مين يا بابا؟
- ما تعاكس، أنا غلطان.
- طيب ولما أقول أنا عاوز أتجوز حاتجوز؟
- لأ طبعا.. لازم شقة وشبكة ومهر.
- لازم شقة وشبكة ومهر؟
- آه، وما تسألنيش فايدة الكلام إيه؟
- وإيه تانى يا بابا؟
- لما تتخرج فى الجامعة وتحب تشتغل تقول أنا عاوز أشتغل
- أقول أنا عاوز اشتغل؟
- آه، ومش حتشتغل
- مش حاشتغل عشان قلت إنى عاوز اشتغل؟
- لأ عشان معندكش واسطة.
- هو أنا معنديش واسطة يا بابا؟
- يخرب بيت اليوم اللى علمتك فيه الكلام، تصدق بالله، إنت خلتنى أحس إن الكلام ما لوش فايدة فعلا.
- الكلام ما لوش فايدة يا بابا؟
- آه
- يعنى أنا اتعلمت الكلام على الفاضى يا بابا؟
- آه
- عجيبة. مع إنى شايف العكس.
- إزاى؟
- أهو ناس بتفش غِلّها، وناس بتتسلى، وناس بتسترزق، وجرايد بتتباع

والله ما فى فايده من الكلام

والله الواد شكله اتعقد من كلامهم

بس ياريت ما يموت نفسه بقى

[ندعوك للتسجيل في المنتدى أو التعريف بنفسك لمعاينة هذه الصورة]

هههههههه حوار جميل ومفيد جدا وجزاك الله خير

» إلحـاق بمسلسل مفيش فايدة بطولة الحزب الوطني