ولسه عايز تقولي فيه أمان

فهمني انته لو انته فاهم
مانا كان نفسي أكون فاهم
ونقعد مع بعض ونتفاهم
والفاهم يقول للي مش فاهم
عشان أصبح واد فهمان

إزاي بتقولي فيه أمان
إزاي مع انتشار الظلم والطغيان
إزاي وأنا قلبي من الأسي طفحان
إزاي مع تكتيف الأيادي وقطع اللسان
إزاي مع كبح العلم وانتشار الإدمان
إزاي بتقولي إن فيه أمان
.........

كل حقيقة سرعان مابتختفي
كل شمعة بنقيدها من دموعنا بتنطفي
أصل الظلم علينا قوي وعفي
والحق أصبح مابينا شيء خفي
ولسه بتقولي فيه أمان
.........

ياعم دا احنا مجروحين
وجراحنا صعبة ماتداويهاش سنين
تِعِبِت قلوبنا من الأسي مع الأنين
دمعت عيونا علي جراح المظلومين
برضه مُصِّر إن لسه فيه امان
.........

سؤال ولازم تجاوبني عليه
فين شهاداتك ياحبيبي؟ وماتقولش ليه
أصل أنا عارف هيا فين وبتعمل ايه
هيا في درج المكتب بتبكي بس علي ايه ولا ايه
ولسه عايز تقولي فيه أمان
.........

يمكن يكون كان زمان
يمكن يكون كان فيه أمان
الحق كان ظاهر علي كل لسان
لكن دلوقتي كل شيء في طي الكتمان
وإياك تفكر في الحق مش تقوله باللسان
أحسن ينقطع لسانك ويمكن رقبتك كمان
وانته جاي تقولي فيه أمان
.........

دا احنا تعبت منا النفوس
والكبير بقي ع الصغير يدوس
والطبيب بقي زي التمرجي في الفلوس
والناس بتقول ع المفكر عبيط مهووس
وانته جاي تقولي فيه أمان
.........

وسطتك هيا الكرنيه
معاك تبقي سعادة البيه
ومن غيرها تبقي ابن الإيه
طيب تقدر تقولي دا كله ليه
ولا انته شاطر بس تقولي دا فيه أمان

التوفيع
[ندعوك للتسجيل في المنتدى أو التعريف بنفسك لمعاينة هذه الصورة]